دادسيز قالان دوزلو گلين

دورو ماوي گؤزلو گلين

اورمونون آغ دون بالاسي

گؤز گؤز اولان جان ياراسي

آغ قانادي سينان ملك

يارپاق يارپاق سولان چيچك

بولودلاري سورگون اولان

ائل اوباسي اوزگون اولان

گور چايلاري آزديريلان

قارا بختي يازديريلان

ايرماقلاري دوستاق اولان

دالغالاري دوزلاق اولان

قودوز يادلار قورقوسوندا

تولكولرين  پوسقوسوندا

آغ خلعتي  بيچيلمه ده

سون بارداغي ايچيلمه ده

آهاي......

آهاي...

ماوي گؤز اورمو گليني

اوزمه يوردوندان اليني

گؤز ياشيميز سئل اولمادا

اورك قاني  گؤل اولمادا

قانالارين  قانين وئرير

بالالارين جانين وئرير

سن ائليمين عزيزي سن

آذربايجان دنيزي سن

سريل آنا ياتاغيندا

جان اورمونون قوجاغيندا

دالغالارين نغمه دئسين

بول محصولون ائللر يئسين

آشيقلارين چالسين سازين

قوتلاياق قورتولوش يازين